Sa kabila ng mga umiiral na batas sa Pilipinas, patuloy na nakararanas ng diskriminasyon, pang-aabuso, at karahasan ang mga miyembro ng LGBTQ+ community dahil sa kanilang sexual orientation, gender identity, at expression (SOGIE). Walang malinaw at komprehensibong batas na nagbibigay-proteksyon sa kanila laban sa diskriminasyon sa paaralan, trabaho, serbisyo publiko, at maging sa loob ng sariling tahanan.
Kaya lumilitaw ang problema: hanggang ngayon, hindi kinikilala ng batas ng Pilipinas ang partikular na karahasan at hindi pantay na pagtratong dinaranas ng sangkabaklaan dahil lamang sa kung sino sila at kung paano nila ipahayag ang kanilang sarili. Ang kawalan ng SOGIE Bill ay nangangahulugang kawalan ng hustisya, akawntabilidad, at proteksyon para sa isang sektor na matagal nang naisasantabi.
Bakit nga ba dapat isabatas ang SOGIE Bill?
Kinikilala nito ang realidad ng karahasan.
Araw-araw, may isang bakla na sinasaktan, pinapahiya, at nakatatanggap ng karahasan dahil lang sa kung paano sila kumilos, ngunit walang batas na nagsasaad na mali ito. Ang katahimikan ng batas ay nagiging mistulang pahintulot sa mga nang-aabuso
Proteksyon ito, at hindi pribilehiyo/
Binibigyan ng batas na ito ang LGBTQ+ community ng karapatang mag-aral, mag-trabaho, at makakuha ng serbisyo nang hindi hinuhusgahan batay sa kung sino ang kanilang napupusuan o kung paano sila magdala ng kasuotan.
Ayon sa Commission on Human Rights (CHR), may 163 na dokumentadong kaso ng pagpatay sa mga LGBTQ+ indibidwal mula 1996 hanggang 2022 na may kinalaman sa kanilang SOGIE. Patunay na hanggang sa kasalukuyan, may pagbabanta pa rin sa kanilang buhay.
May iilan ding nagsasabi na wala nang silbi kung ipapasa ang SOGIE Bill sapagkat sakop na raw ito ng konstitusyon ng Safe Spaces Act. Ngunit sa reyalidad, walang umiiral na batas ang tahasang nagpapanagot sa mga taong itinuturing na “biro" lamang ang pangungutya at pagtanggi sa karapatan ng mga bakla.
Ang SOGIE Bill ay hindi usapin ng relihiyon laban sa karapatan, o ng tradisyon laban sa pagbabago—ito ay usapin ng buhay laban sa karahasan. Ilang dekada nang naghihintay ang LGBTQ+ community para sa isang batas na kikilala na ang sakit na dinanas nila ay totoo; na may dapat managot sa bawat pang-aabusong nakabase sa SOGIE; att na ang dignidad ay hindi pribilehiyong iginagawad lamang sa iilan. Ang batas na hindi kumikilala sa sakit ng tao ay batas na bulag sa hustisya at ang lipunang tunay na makatao ay hindi pumipili kung sino ang poprotektahan.
Written by AGOS
AGOS is a dedicated campus journalist and contributor. Their insightful writing sparks meaningful conversations and keeps the community informed.
