MANILA, Philippines — Pinalawak ng Department of Education (DepEd) ang Learners TeleSafe Contact Center Helpline (#33733) matapos itong direktang iugnay sa National Center for Mental Health Crisis Hotline upang mapabilis ang pagbibigay ng tulong sa mga mag-aaral na nakararanas ng depresyon, bullying, pang-aabuso, at iba pang suliraning may kinalaman sa kalusugang pangkaisipan.
Sa ilalim ng mas pinaigting na sistema, magsasagawa muna ng paunang assessment at paggabay ang Learner Rights and Protection officers ng DepEd bago agad i-refer sa mga espesyalista ng NCMH ang mga kasong nangangailangan ng agarang atensyon at propesyonal na interbensyon.
Ayon sa DepEd, layunin ng hakbang na mas mapalapit sa mga mag-aaral ang agarang suporta, lalo na sa mga kabataang dumaranas ng matinding emosyonal na suliranin at nangangailangan ng ligtas na espasyo upang makahingi ng tulong.
Pinangunahan ni Sonny Angara, ang Kalihim ng Department of Education (DepEd), ang paglulunsad ng pinalawak na hotline sa Valenzuela City kasabay ng isinagawang aktibidad sa Iloilo City at Cagayan de Oro City bilang bahagi ng pagpapalawak ng mental health at learner protection services sa mga paaralan sa buong bansa.
Maaaring makipag-ugnayan ang mga mag-aaral sa pamamagitan ng #33733 (#DEPED), 0945-175-9777, email na weprotectlearners@deped.gov.ph, at Viber para sa agarang tulong at gabay.
Sa gitna ng dumaraming kaso ng bullying, pang-aabuso, at problemang pangkaisipan sa hanay ng mga kabataan, umaasa ang DepEd na mas marami pang mag-aaral ang magkakaroon ng lakas ng loob na magsumbong at humingi ng tulong sa oras ng pangangailangan.
Written by Jan Gabrielle Visda
Jan Gabrielle Visda is a dedicated campus journalist and contributor. Their insightful writing sparks meaningful conversations and keeps the community informed.
