Nagpahayag ng matinding pagtutol si Pangulong Ferdinand “Bongbong” Marcos Jr. sa panukalang amyendahan ang mga tuntunin ng Senado upang payagan ang online participation at remote voting ng mga senador sa pamamagitan ng teleconferencing.
Sa naging pahayag ng Pangulo nitong Biyernes habang nasa state visit sa Tokyo, Japan, sinabi niyang hindi niya sinasang-ayunan ang paggamit ng remote voting, lalo na kung gagamitin ito upang makalahok sa sesyon ang isang senador na may kinahaharap na legal na usapin.
Ayon kay Marcos, tila si Senador Ronald “Bato” Dela Rosa lamang umano ang direktang makikinabang sa naturang panukala.
“It seems to only be applicable to Senator Bato para makaboto si Senator Bato dahil nagtatago siya,” ani Marcos.
Dagdag pa ng Pangulo, dati lamang ginagamit ang remote participation noong kasagsagan ng COVID-19 pandemic dahil sa banta sa kalusugan, ngunit wala umano siyang nakikitang sapat na dahilan upang ipagpatuloy ito sa kasalukuyan.
Kasabay nito, sinabi rin ni Marcos na hindi niya maintindihan kung bakit nauwi umano sa sitwasyong tila pinoprotektahan ng Senado ang isang “fugitive from justice.”
“The Senate is now sheltering a fugitive from justice. How did that happen?” pahayag ng Pangulo.
Ang mga pahayag ni Marcos ay kaugnay ng usapin hinggil kay Dela Rosa, na nahaharap sa umano’y arrest warrant mula sa International Criminal Court (ICC) dahil sa crimes against humanity charges na konektado sa war on drugs ng administrasyon ni dating Pangulong Rodrigo Duterte.
Gayunman, iginiit ng kampo ni Dela Rosa na hindi maaaring ituring na “fugitive” ang senador dahil wala umanong warrant of arrest mula sa korte sa Pilipinas. Samantala, ibinasura na ng Supreme Court ang petisyon ni Dela Rosa para sa Temporary Restraining Order (TRO) laban sa implementasyon ng ICC warrant.
Ayon pa kay Marcos, hindi dapat pahintulutang bumoto ang isang indibidwal na hinahanap ng mga awtoridad at may kinahaharap na warrant.
“Now, for someone who is actually a fugitive from justice na hinahanap ng pulis, na hinahanap ng Interpol at may arrest warrant galing sa ICC, palagay ko hindi siya dapat bumoto,” dagdag niya.
Ang panukalang payagan ang online voting sa Senado ay unang inihain ni Senador Rodante Marcoleta noong Mayo 11, sa parehong araw na muling nagpakita si Dela Rosa sa plenaryo matapos ang halos anim na buwang pagkawala sa publiko.
Kalaunan ay iniulat ding umalis na si Dela Rosa sa protective custody ng Senado.
Binigyang-diin din ni Marcos, na nagsilbing senador mula 2010 hanggang 2016, na matagal nang tradisyon sa Senado ang pisikal na pagdalo ng isang miyembro bago mabilang ang kaniyang boto sa plenaryo.
Bukod dito, binanggit din ng Pangulo ang umano’y mga kaguluhan at kalituhan sa loob ng Senado nitong mga nakaraang araw, kabilang ang napaulat na insidente ng putukan na kalaunan ay sinabing hindi naman totoo.
“Narating pa tayo sa putukan, tapos fake pala yung putukan, tapos hindi ko maintindihan. Walang nangyayaring kagaya niyan noong panahon ko sa Senado,” ani Marcos.
Ang mga pahayag ni Marcos ay nagmula sa kaniyang press briefing kasama ang Philippine media delegation sa Tokyo, Japan, habang patuloy ang diskusyon sa Senado hinggil sa remote participation at online voting.
Patuloy namang umiinit ang talakayan sa Senado hinggil sa attendance rules, remote participation, at parliamentary procedures habang lumalalim ang usapin ukol sa accountability at partisipasyon ng mga senador sa mga sesyon ng kapulungan.
Written by Jan Gabrielle Visda
Jan Gabrielle Visda is a dedicated campus journalist and contributor. Their insightful writing sparks meaningful conversations and keeps the community informed.
