Inanunsyo ng P-pop girl group na MNL48 na tuluyan nang magtatapos ang kanilang mga aktibidad sa huling bahagi ng Mayo 2026, ayon sa opisyal na pahayag ng kanilang management company na P.O.S Inc. nitong Miyerkules.
Sa inilabas na statement sa official Facebook page ng grupo, ipinaliwanag ng kumpanya na nabuo ang kanilang desisyon matapos ang malalim na pag-uusap kasama ang grupo.
"After carefully considering the sustainability of the management structure, the future operating environment, and the various conditions necessary to continue supporting the group in a stable manner, we have come to the conclusion that it would be difficult to continue MNL48's activities going forward," ani P.O.S. Inc.
Humingi rin ng paumanhin ang P.O.S. Inc. sa mga fans ng grupo kaugnay sa biglaang pag-anunsyo ng kanilang pagtatapos.
Nagpasalamat din sila sa walang sawang suporta ng mga tagahanga sa pananatili nila kasama ang grupo sa entertainment industry.
Kilala ang MNL48 sa pag-awit ng Filipino-language versions ng ilan sa mga kanta ng AKB48, isang Japanese girl group at sister group ng MNL48.
Nabuo ang grupo sa pamamagitan ng audition segment sa noontime show na It’s Showtime.
Sa nagdaang taon, isa ang MNL48 sa mga grupong tumulong sa pag-usbong ng P-pop sa bansa at nagpakilala ng idol-group system sa Pilipinas.
Habang papalapit ang pagtatapos ng kanilang mga aktibidad, patuloy na ipinapahayag ng fans ang kanilang pasasalamat sa mga alaala, performance, at impluwensyang iniwan ng grupo sa entertainment industry ng Pilipinas.
Bilang pasasalamat sa kanilang supporters, inilabas ng MNL48 ang 2026 version ng music video ng kanilang viral hit na “Pag-ibig Fortune Cookie.”
Ayon sa management, ang proyekto ay alay para sa mga fans at nagsisilbing pasasalamat ng mga miyembro.
"This work contains our gratitude toward all the fans who have supported us, as well as the heartfelt feelings of the members themselves," dagdag ng kumpanya.
Written by Isaiah Adorza
Isaiah Adorza is a dedicated campus journalist and contributor. Their insightful writing sparks meaningful conversations and keeps the community informed.
