Dalawang piloto ng Philippine Air Force (PAF), kabilang ang isang babae, ang nasawi matapos bumagsak ang isang SF-260 trainer aircraft sa Mt. Sto. Tomas, Sitio Cabuyao, Barangay Poblacion, Tuba, Benguet, noong umaga ng Mayo 20.
Ayon sa mga awtoridad, naganap ang insidente bandang 10:20 ng umaga habang nagsasagawa ng navigation training flight ang eroplano patungong Baguio City. Sinabi ng PAF na kabilang ang sasakyang panghimpapawid sa 10 aircraft na lumipad mula sa Fernando Air Base sa Lipa, Batangas.
Kinilala ng mga awtoridad ang isa sa mga nasawi bilang si 1st Lieutenant Ruth Angelique R. Pasos. Hindi pa inilalabas ang pagkakilanlan ng isa pang piloto sa oras ng pag-uulat.
Nakatanggap ang mga awtoridad ng ulat mula sa kapitan ng Barangay Poblacion tungkol sa pagbagsak ng eroplano. Bandang 11:40 ng umaga, agad na rumesponde ang mga tauhan ng Benguet Police, Bureau of Fire Protection, Municipal Disaster Risk Reduction and Management Office (MDRRMO), at ilang residente para hanapin ang lokasyon. Natagpuang wala nang malay ang dalawang piloto at agad na isinugod sa ospital, ngunit kapwa idineklarang pumanaw.
Nagsasagawa na ng imbestigasyon ang mga awtoridad upang matukoy ang sanhi ng pagbagsak ng aircraft.
Written by Paolo Baya-on
Paolo Baya-on is a dedicated campus journalist and contributor. Their insightful writing sparks meaningful conversations and keeps the community informed.
